Salomon August Andrée er kjent for sitt forsøk på å nå Nordpolen i ballong. Han starta frå Danskeøya på Spitsbergen 11.07.1897 med to hjelparar, men dei kom aldri attende i live. 

Den svenske ingeniøren Salomon August Andrée (1854-97) gjorde ni vellukka ferder med ballongen "Svea" i åra 1893-97, som hadde vitenskapleg føremål, men i 1896 vart starten på eit forsøk på å nå Nordpolen i ballong mislukka. 

Han starta på ny med ballongen "Örnen" frå Spitsbergen 11. juli 1897 saman med K. Fränkel og N. Strindberg. Etter berre 3 dagar vart ballongen nedisa og dei måtte naudlande 14. juli nær 83° N. Etter 3 månader med slitsom marsj over drivisen kom dei til Kvitøya 5. oktober, der dei slo leir. 

Kort tid etter døydde alle tre. Levningane vart først funne i august 1930 av ein norsk ekspedisjon på Kvitøya, med dr. Gunnar Horn som leiar. Ein fann også dagbøker, som viste at dei hadde nådd 83° N breidde. 

Same året (1930) kom boka "Med Örnen mot Polen", skrive på grunnlag av dagboknotater og framkalla fotografi frå ballongferda. 

Funn som vart gjort etter ballongferda er utstilt i Andréemuseet i Gränna, Småland - fødestaden til Salomon August Andrée. 

Ferda er også skildra i dokumentarromanen "Ingenjör Andrées luftfärd (1967) av Per Olof Sundman, og i den svensk-norske filmen "Ingenjör Andrées luftfärd" (1982), der Jan Troell har regien. 

Les også om Nordpolekspedisjonar