Lokalhistorie
Foto: Scandion

Masfjorden si historie er skapt av små og store hendingar gjennom århundrer.  Mangt og mykje av denne historia kan ein lese om i gamle skrifter, kyrkjebøker, utvandringsprotokollar, bygdebøker, sogehefter o.l. 

Framleis er det informasjon om mange hendingar, i vår nære og fjerne fortid, som ikkje er komen på trykk, eller allment lett tilgjengeleg. 

Fram til 1875 var Masfjorden ein del av Lindås kommune, prestegjeld og lensmannsdistrikt under namnet Sandnes sogn. I 1876 fekk Masfjorden eigen sokneprest, det kommunale sjølvstende kom i 1879 - og eigen lensmann år ettter. 

Skipreider 
Gamle skrifter syner at det i middelalderen har vore eit skipreide nemnd Fjonner, og i Fjonner er nemnd Sandnes Sogn. Gardar som er nemnde er: Frøyseetr, Berghagavik (Bergsvik), Eikemor, Arnahvammer, Arakletr, Hauksdaler og Matrar. (P.A. Muncks: Kongeriket Norge). 

På 1600-talet høyrde største delen av Masfjorden under Gulen skipreide, som då var ein del av Hordafylket. Det gamle Gulatinget låg såleis innanfor fylkesgrensa på 900-talet. 

Austfjordgardane, frå Elvik til Kvingo, kom under Eikanger skipreide. Men frå 1774 kjem Masfjorden under Lindås skipreide, og gardane langs Austfjorden i 1853. 

Masfjorden er eit bygdelag med gode skogsvidder, og det har vore skipa mykje ved og bygningstømmer utover til kystbygdene. Det var vanleg å skaffa seg tømmer frå Masfjorden i byte mot fisk.